Katar sa e but thana kaj trajin čorre manuša ando Beogrado, e Gazela si jekh katar godola thana, save majbut pusaven ande jakh.
E Gazela si gajda lačhardi, kaj si la maškarutno than ando Beogrado, katar o purano foro dur si duj kilometrurja thaj numa o
dorjav Sava si maškar lende. Paše katar e Gazela si e majlačhe hotelurja, o majimportantno than, kaj inćaren pe
diferentne manifestacije, sargodi vi e majbari hala ando foro pala o sporto.
Trujaldini si e Gazela na numa bare bešimaske kompleksurjenca (ćherenca) thaj uče reprezentativnone publikaće ćherenca,
majanglal numa vi importantnone dromenca: O bešimasko than katar jekh rig trujaldino si katar o podo Gazela, e podosa katar o auto-drom E 75,
sargodi vi e dromesa pala o treno prdal savo o treno aresel e šerutni trenoski ačhavni.
Kava bešimasko than naj numa o
ilo maškar o Purano thaj o Nevo Beogrado, numa si vi o maškar katar e trenoske šine thaj e tranzitne droma,
save džan katar e nordo-zapadoski rig džikaj jugo-istočno rig e Evropaći thaj si drom, savesa si o Beogrado
phanglo e Njamcosa thaj e Turskasa. Akava ekstremno than katar e Gazela sikavel, sostar si kaja cara gadići pindžardi:
Auto-dromesa thaj trenosa katar či naćhen na numa internacionalne droma, numa katar naćhen vadžaj vi e importantne
droma katar o foro Beogrado. E Gazela pindžaren savorra, save trajin ando Beogrado thaj naćhen varesave bućasa prdal kava
foro, numa von "či pindžaren la vorta".
Historija
O izvoro katar e čorre care si jek čorrivano provizorijumo, numa o manko katar alternative, e igonoransa katar e rajenđi rig thaj
e marginalizacija katar e caraće manuša ćerel, te kerdol katar o provizoijumo jek permanentno bešimasko than.
E historija, kana fundosajli e Gazela naštik araćhel pe ande nisoske ramome lila niti ande nesave patreturja, numa pale varesar
šaj avel pe dži kote, sar sas o dumutnipe kale carako: Karing o brš 1983 sas jekh zurali ekonomijaći kriza ande
Jugoslavija pala godova so mulo o Josip Broz Tito. Odolaći kaj sas
maripe ande Jugoslavija ande brša karing 1990 sa majbut manuša kate avenas thaj vazdenas pire ćhera.
Sargodi produkto e marimasko po Kosovo, o numero e barakengo thaj kolibengo ćerdilo inke majbaro, katar o brš 1998 džika brš 2000.
Vi ađes kaja cara barjol, pala jek manušengo đinipe, savo sas ćerdino ando milaj 2007 - e maj aktualne brojura,
save si pe vas- sas ande Gazela pe kaja vrama 212 bešimaske objekturja, ande save trajisarde karing 1000 manuša.
![info [at] beogradgazela [dot] net](images/email_txt.gif){kind=small}